中年好聲音3｜陳芷盈《領悟》舞台破100萬點擊李金凱二度獲MVP締造美好回憶

《中年好聲音3》偶像之歌淘汰賽完結，14強選手正式誕生，呢集演繹偶像陳曉東經典歌《心有獨鍾》嘅陳芷盈，再一次攞到全場最高分，可惜依然同MVP擦身而過，但係芷盈並冇失望，而佢之前演繹嘅《領悟》喺網上突破100萬點擊，成為首位舞台收看破百萬嘅《中聲3》唱將。

芷盈連日收到好多朋友通知佢呢個喜訊，特別想多謝網民咁支持，仲喺網上留言話就快衝破呼籲大家去睇，感激每位支持自己嘅小天使。至於最高分卻未能獲得MVP，芷盈大方表示若果自己係評判都會選金凱，認為佢既係生命鬥士，唱歌又好聽，能夠感染人心，所以攞MVP都好正常，自己會繼續努力。

李金凱以一分之微僅次於芷盈，再度獲封MVP，佢上台領獎時表現得好愕然，表示完全冇諗過自己會再獲殊榮，因為覺得有更超班嘅選手，大家都有機會，金凱會將獎項好好收藏，多年後回看一定係美好回憶。

另外，呢集被淘汰嘅選手陸東成同侯靜伊亦分別發表感言，陸東成公開多謝女友一直陪伴經歷起跌，侯靜伊則呼籲支持佢嘅粉絲唔好失望，佢會繼續努力喺其他舞台同大家見面。