金牌經理人黃柏高經歷喉癌 完全化療重拾健康再戰樂壇

「多謝Paco」呢句說話曾經係唔少歌手喺樂壇頒獎禮上面嘅致謝感言，現年74歲嘅Paco以往應酬多兼無酒不歡，不過幾年前曾傳出佢患上重病。經歷過去五年，Paco已經放下酒杯注意健康，全因多年飲酒習慣令身體響起警號，Paco近日接受傳媒訪問時透露69歲嗰年，經醫生診斷患上喉癌。見住自己喉嚨出血，諗過逃唔過呢劫，佢坦言治療過程好辛苦，而化療係最大挑戰。面對眼前嘅不安同無助，Paco終於明白健康嘅重要，於是決心戒酒。

Paco經理人生涯中，遇過唔少拆彈事件，喺佢準備休息前，就爆出許志安同黃心穎嘅「安心事件」，Paco話當時安仔唯一可以做就係面對，因為自己做錯就要公開認錯，希望大家畀機會。佢亦勉勵安仔指發生咗嘅事總會有人提起，靠自己做好去盡量淡化。至於有一位已故嘅年輕歌手，Paco直認係多年嚟一個遺憾，呢位歌手就係2013年喺車禍中離世嘅Sita陳僖儀。Paco話Sita好有潛質、唱得好好兼有上進心，前途無可限量，可惜英年早逝。

有「金牌經理人」之稱嘅Paco黃柏高，喺1977年加入華納唱片做宣傳人員後，就展開佢喺樂壇嘅輝煌旅程。多年嚟合作嘅歌手不乏巨星如陳百強、林子祥等，面對住樂壇嘅興衰改變，Paco依然憑實力捧紅許志安、古巨基、側田等歌手。之後涉足電影界更同樣憑獨到眼光，獲得驕人成績。直至2020年Paco約滿太陽娛樂，成立新公司。甚少公開露面嘅Paco，直至今年終於出山，帶領網絡歌手老虎歌皇再戰樂壇，佢覺得工作係一種動力，令自己變得活躍，所以再戰樂壇係無壓力，一切隨遇而安。