59歲李若彤大騷完美腹肌 自律運動30年成就凍齡外貌

今年即將踏入59歲嘅「最美姑姑」李若彤，近日喺微博post出一張健身相，大方騷出六舊腹肌，完美體態加上幾乎素顏出鏡，令唔少網民驚呼59歲嘅李若彤凍齡外貌「太不科學」。

李若彤曾喺訪問中透露自己由30歲過後開始有系統健身，每日運動持續30年，自律程度堪比運動員，佢喺post中寫到「時間和熱愛會在你身上雕刻出努力的痕跡」，不少網民更加一致稱讚姑姑嘅完美腹肌。

李若彤1995年演出嘅《神雕俠侶》小龍女一角締造經典，亦為佢贏得「最美姑姑」稱號，佢同古天樂嘅神仙拍檔至今依然深入民心。不過當紅之際佢卻為愛淡出幕前，直至近年開始復出，並將事業重心移往內地。

今年三月佢身兼監製同主演嘅短劇「午夜玫瑰」喺內地電視台黃金檔播出，雖然單集只有四分鐘，但描寫中年女性重返職場嘅故事引起廣大共鳴，收視贏過唔少傳統電視劇，喺影音平台播放量更高達1.9億，為佢再創事業高峰，難怪李若彤會話「59歲正是闖的年紀，未來計劃嘗試導演工作。」