鍾景輝88歲生日近照曝光 獲晚輩陪伴到西貢看海景

戲劇大師「King Sir」鍾景輝喺23號度過88歲生日，桃李滿門嘅King Sir喺演藝界培育不少人才，亦廣受圈中人敬重。King Sir即使2016年患上大腸癌兼接受手術，仍繼續敬業樂業，2018年參與劇集《牛下女高音》演出，隨後King Sir淡出幕前。

去年梁祖堯與演藝校友們到King Sir家拜年，令一段時間無露面嘅King Sir曝光，當時King Sir精神奕奕，更向學生們派利是。到今年King Sir生日期間，前DJ夏妙然與倪秉郎一齊前往跟King Sir慶祝生日，而King Sir身處地方疑似係護老院。未知是否引起外界報道King Sir疑入往護老院，夏妙然已將相關短片及帖文「消失」。

另外，戲劇導師余俊峰亦前往探望King Sir，佢更陪伴King Sir到西貢海邊睇海景，頭戴白色Cap帽、着住間條恤衫嘅King Sir全程坐輪椅，去海邊時候仲自己拿下口罩呼吸新鮮空氣，相中見King Sir精神尚可，但明顯比去年農曆年時消瘦。