最新回應丨33歲李蘊親證與內地才俊老公離婚兩年 拒回應是否涉及第三者！

今日有周刊報道指前少女組合Cream成員李蘊（Renee），與內地金融才俊丈夫羅章冠（David）婚姻亮起紅燈，李蘊喺3月25號傍晚親證與內地才俊羅章冠（David）經已離婚兩年，被問到離婚是否涉及第三者？李蘊拒絕回應離婚原因，並表示身邊朋友都知道佢離婚一事，而媽咪亦係永遠最愛佢嘅人。

至於同前夫是否再見亦是朋友，佢直認大家仍係一對子女嘅父母關係，回復單身嘅佢表示一切安好，現時自力更生期待更多工作機會，由於香港租金貴，未有考慮返港長住，佢仲話一直都香港同廣州兩邊走，返港就會返屋企住。

夫婦兩人於2015年結婚，李蘊婚後移居廣州，並誕下一女一子，一度淡出娛圈，專心相夫教子。李蘊早前受訪時講過老公支持佢再追歌手夢，跟住就爆出其丈夫只想李蘊做全職家庭主婦，更有指二人出現爭拗，而周刊內容指李蘊日前喺九龍塘約友人打邊爐，全程愁眉深鎖，飯後更一個人坐的士返回觀塘順利邨娘家，未有返內地5,000呎安樂窩。

翻查李蘊嘅社交平台見佢同羅章冠去年5月仍有一齊為愛女舉行生日派對，羅章冠亦有影大合照；而李蘊平時去邊都帶埋一對寶貝仔女同行，噚日卻罕有喺社交平台曬獨自飛三藩市嘅相，原來佢係飛去三藩市睇好姊妹鄧紫棋嘅演唱會，並意有所指強調自己有好友陪伴，感覺充滿正能量，原來李蘊同羅章冠已離婚兩年！