奪命提示‧獨家丨張振朗與劉穎鏇冷鋒下拍咀戲 兩人分享夢想中婚禮畫面

張振朗喺新劇《奪命提示》飾演嘅招俊朗，因為擔任卧底而臨時甩底註冊結婚，令劉穎鏇飾演嘅溫嘉莉深受傷害。正當俊朗復職警察想同嘉莉重修舊好時，令嘉莉憶起俊朗喺摩天輪下海邊求婚咀嘴溫馨畫面。

拍攝呢幕咁甜蜜嘅戲份，Tiffany話事前彼此都按劇本溝通好多，又拍咗好多親熱戲，所以好快就會搵到默契，振朗認同Tiffany講法，因為之前拍咗唔少更尷尬嘅場面，所以打破咗隔膜。

拍攝當晚正正係寒流襲港，好彩冇影響兩人甜蜜表現，振朗笑住扮震話「一啲都唔凍」，Tiffany話呢晚已經好好彩，原來平日拍攝現場嘅碼頭係好大風，佢自覺好幸運，不過都貼晒全身暖包取暖，振朗仲話劇組好窩心準備薑茶暖身。

兩人現實中，男未婚女未嫁，但Tiffany已憧憬自己被求婚畫面，佢覺得兩個人求婚嘅環境會再浪漫甜蜜，至於成班人一齊見證會開心，但係可以留喺求婚之後先慶祝。振朗認同Tiffany講法，兩個人嘅事，兩個人就夠，佢仲話自己現實生活中，冇劇中咁多諗頭。