StarTalk丨甄子丹缺乏自信被誤認為扮酷 談愛女甄濟如流露為人父驕傲

宇宙最強甄子丹連續13年擔任打吡大使，佢作客《StarTalk》接受專訪分享心情，佢話覺得好榮幸，因為賽馬係香港一個好有代表性嘅活動。

丹爺話拍電影已經42年，前20年都處於一個艱苦嘅環境，唔止星途浮沉，自己對演戲嘅諗法亦唔夠清晰，有好多時候都覺得徬徨，好彩因為冇退路，所以先可以一路堅持。

而講到人生最大嘅轉捩點，丹爺就話一定係識到老婆汪詩詩，以前大家可能會覺得佢好寸、好酷，但其實佢唔係冷淡，亦唔係扮酷，只不過係唔敢講嘢，因為自己其實好內向同缺乏自信，成日出席活動都希望攝影機唔好影住自己，就連粉絲要求簽名合照，佢都覺得好尷尬，搞到好多人都以為佢係拒人於千里之外，但因為太太係一個好開朗嘅人，加上最近年紀大，開始諗通好多嘢，所以先慢慢改變。

丹爺嘅愛女甄濟如正式入行做歌手，丹爺話初頭都有好多考量，因為知道呢條路唔易行，一定會經歷好多失敗同批評，尤其身為甄子丹個女，更加需要強大嘅心態，不過佢就大讚愛女好有天份，言談之間充滿為人父嘅驕傲。