與鄭中基傳婚變後曬自拍照 余思敏以歌曲勉勵自己繼續前進

盛傳同 鄭中基 正辦離婚嘅 余思敏Sammie，25日喺限時動態曬出自拍照，著住小背心、戴上黑框眼鏡嘅佢，睇落容光煥發狀態似乎唔錯，不過亦有網民覺得係照騙，話只係用咗美顏效果。Sammie除咗曬出近照外，佢更以英文歌《Keep Moving Forward》作為背景音樂，唔知係咪想憑歌寄意，表達自己不斷前進嘅積極態度呢？

其實外界一直猜測Sammie同鄭中基婚變都唔係無憑無據，好似日前Sammie 45歲生日，佢只係曬出同仔女慶祝嘅合照，但就未見老公鄭中基嘅蹤影，而Sammie亦寫道：「Happy Birthday to me. Start a new chapter」強調開展新一章之餘，又似係為自己加油打氣！而佢一班主播朋友亦曬出早前為Sammie慶祝生日嘅相片，佢哋嘅留言寫亦似係為壽星女打氣，好似鄭文就寫道：「You can make it through the rain and stand up once again on you own」、「不需要慌，天定會光……你可以有更好的，原來不壞，還不壞….要相信一切是最好的安排」，而吳芳雯就寫道：「請記得好好哄自己，會有很多人愛你。」

而鄭中基爸爸鄭東漢早前被問到阿仔驚爆婚變一事，雖然鄭父未有正面回應，只係話佢哋兩個人嘅事唔到佢話事，但就話如果兩人真係離婚，作為父母都唔會開心，只希望唔好影響小朋友。

Sammie同鄭中基婚後，長年以恩愛形象示人，當大家以為呢次Sammie終於收復咗浪子鄭中基，將佢由無賴變成好老公時，去年8月Sammi突然拋下震撼彈，Tag老公同佢經理人何慶湘，預告「Something big are coming….」，並加上一張疑似酒店地氈相，引嚟網民無限聯想。翌日鄭中基就指經理人何慶湘工作及道德操守有問題，與對方中止合作關係，期後鄭中基稱自己患抑鬱症，並透露由太太陪同到美國參加戒酒中心療程，但就未有解釋何慶湘有咩道德問題，因而未能平息網友懷疑佢哋之間有感情瓜葛等問題。

鄭中基早前完成美國戒酒療程返港，重返佢嘅網上頻道，正當外界以為佢準備全面復出，就突然傳出佢同Sammie正辧理離婚手續，而佢主演嘅電影《阿龍》亦後延上畫。