鄧兆尊與三女友已冇親密接觸 對方有需求要入紙申請

一向敢言嘅鄧兆尊，繼早前公開自己以年結方式畀家用三位女友後，近日佢就同喺加拿大返港嘅李婉華，同埋網台主持潘小文一齊做直播，兆尊難得同老友聚舊，當然繼續暢所欲言，話題亦離唔開佢同三位女友嘅相處日常。

現年57歲嘅兆尊享盡齊人之福，大家都想知佢點寵幸幾位女友，點知兆尊竟語出驚人，直言同三位女友好耐冇親密接觸，仲話「唔好呢味嘢」。婉華就化身網民嘴替，追問若果女友有需要時會點解決？兆尊就幽默咁表示：「入紙申請囉，等我儲定啲能量同你開戰。」

不時喺周末會合明星足球隊外出比賽，婉華同小文就八卦問賽後會唔會有課外活動？兆尊表示最多周圍行街同埋按摩，而按摩場係可以畀小朋友出入，強調係好健康活動。婉華聽到兆尊齋靠踢波儲能量，就好奇咁問有冇進補，看透世事嘅兆尊就笑住話只有蠢男人先補，因為補完又係益返另一半。

對於唔少人都鍾情年輕貎美嘅女仔，兆尊就有一套「不正常男人嘅睇法」，佢覺得18至30歲嘅女性唔係唔靚，不過煩，但50幾嗰啲就正到痺，知書識禮仲唔會煩人。