張敬軒被變身港版白雪公主 親回搞笑向P圖網友送上「慰問」

由Rachel Zegler主演嘅真人版《白雪公主》上映後票房仆直，更喺外國電影評分網被打至1.7分（滿分10分）。大家一致認為Rachel呢位新「白雪」無論喺言論抑或外表都難以成為公主，反而飾演惡毒母后嘅Gal Gadot被外界認為靚過公主本人。

一向好有創意嘅香港網民就發現過去曾經以「火龍果」、「降兩度」女角身份示人嘅張敬軒同Rachel「撞樣」，紛紛P出多張「新劇照」，將軒仔P成「白雪」，成功令軒仔本人睇到。軒仔平時積極喺網上同大家互動，今日post出「軒仔白雪」肖像並配文：「你哋班人恨到啦，我諗你成世人都冇諗過， 有朝一日會得到白雪公主會同你講早晨呀🙄😒恭喜大家成就解鎖！早晨呀你哋。」

軒仔跟住更搞笑向P圖嘅網友送上「慰問」，話希望做呢幅圖嘅朋友，「返工要注意交通安全，食飯要慢嚼細嚥，飲水要細細品嚐，落雨出街要帶定支避雷針」，佢喺留言寫「雪姑同各位X友講早晨」非常搞笑，更有人繼續發揮創意腦洞，將軒仔好友王菀之玩埋一份，令王菀之成為「母后」。

講返電影《白雪公主》嘅女主角Rachel，其實佢本人有唔少搶口過激言論，更無故連累Gal Gadot收到死亡威脅，搞到要搵保鑣跟身。Rachel曾喺訪問提及新版故事有別於原作，激到擔任1937年版《白雪公主》卡通電影版導演David Hand嘅91歲兒子飛起，並狠批新版《白雪公主》係對華特迪士尼先生及爸爸嘅侮辱。