林鉫徫改名林彥言寓意新開始 獲新歌MV導演顏米羔讚醒目

《中年好聲音》唱將林鉫徫改咗新名叫林彥言，比賽至今推出首支個人單曲《做自己的光》，佢仲搵嚟《中聲2》嘅顏米羔執導新歌MV。MV中大玩光影效果，除咗喺燈光上花心思，連阿Jay嘅造型事前都諗過度過，簡單得嚟又有藝術感。

Jay解釋改名寓意係自己新開始，再配合首支單曲面世。構思MV時因為考慮到用好多光影效果，所以喺輪廓度落功夫，再同髮型師溝通，就得出MV中嘅造型。米羔話個髮型望落去似好多個「J」字，Jay即笑言「咁大家記得要慢慢J我個MV」。

雖然拍攝現場佈局簡單，但係為咗配合米羔360度全方位拍攝，Jay起初都唔係好習慣，因為要追住啲光嚟唱，仲要兼顧一啲動態嘅嘢，不過米羔就大讚Jay好快就進入狀態，兼且學習能力好強，最後再加入自己嘅構思。