溫碧霞紀錄最真實優雅美態 新書大談生活理想與初心

溫碧霞 Irene 雙喜臨門！除咗主演嘅電影《謊島美人魚》即將喺復活節檔上映外，佢嘅第五本靚相集亦喺3月底正式面世，並預告將會現身今年7月書展，大家萬勿錯過！

Irene今次推出嘅靚相集有別於以往，呢次並冇專程前往某個特定地點拍攝，而係將過去兩年佢曾到訪意大利、西班牙、美國、泰國等地，將鏡頭下嘅Irene完全紀錄喺相集之中，Irene亦親自撰文分享心底話。

文中Irene話希望可以將最靚嘅送俾粉絲，亦感覺每到一個地方，就好似人生有唔同階段唔同經歷。當面對挫折時，佢會勉勵自己好快就可以企返起身，而講到對電影嘅初心，Irene就話要不斷堅持同鞭策自己，更坦言電影係自己理想，如果有一日失去理想，生命將失去意義，所以唔可以成為一個冇理想嘅「空洞的我」。

Irene喺相集分享同同事相處點滴，表示自己好愛一班工作伙伴，大家係戰友亦係朋友。每次出埠工作，一定寓工作於娛樂。大家認真努力完成工作後，自己都會請大家食餐好嘅，亦會帶大家去遊山玩水。

一向人靚心善嘅Irene，每次推出寫真靚相集，都會為趙曾學韞嘅「善學慈善基金」籌款，今次亦唔例外，佢繼續以基金「愛心大使」身份捐出100本作慈善拍賣，籌得善款會全數捐出。Irene表示，希望每本寫真都充滿意義，既係送俾粉絲們留念，又可做善事幫助有需要嘅人，盡一點綿力。