陳彥行成功捉到爆料者 鄧兆尊就張慧儀被影射而道歉

鄧兆尊同陳彥行呢對《皆大歡喜》嘅螢幕CP合體現身，接受薛家燕嘅電台訪問。之前行姐被爆秘密產女後，兆尊被指係爆料嫌疑犯，好在最後行姐緝兇成功，搵到爆料真兇。行姐就話，當時知道自己接囡囡放學嘅相被爆出後，都諗住可以公開升級做媽媽嘅喜訊，估唔到後面被爆出更多事。行姐直指爆料人唔尊重朋友私隱，自己都會同爆料人少聯絡。

對於B女爸爸係咪傳聞中嘅「黃子華司機」，行姐就話另一半係圈外之外嘅人，完全同娛樂圈冇關，亦對子華神感到唔好意思。行姐透露同另一半認識係好簡單嘅過程，並無複雜關係。

兆尊一向敢言，佢喺網台自爆同三位女友嘅閨房事，仲話有需要就「入紙申請」，等佢儲能量開始。兆尊笑言自己只係講笑：「唔通返去同女朋友打羽毛球真係要入紙咩？」行姐更妙語連珠，話兆尊可能係打籃球，又指兆尊最有資格生BB，因為有財力有精力仲有多位佳麗，只係兆尊怕教。

兆尊早前爆料指一位90年代女星同時間同六位富豪交往，後來有咗BB獨力扶養至今，有人認為矛頭直指張慧儀，令慧儀喺接受鍾慧冰訪問時都激動回應反駁謠言。兆尊亦就此事公開道歉，仲話自己同慧儀好好朋友，點會爆慧儀八卦，仲叫慧儀打電話俾自己。