農夫開騷憑歌寄意悼念方大同 C君透露好友逝前籌備出新專輯

農夫 一連兩場演唱會28號晚揭開序幕，呢次演唱會歌單由歌迷選出，互動性十足。C君、陸永唱出多首經典作令全場氣氛高漲，而陸永太太同兩個囡囡都有捧場。唱到第九首歌《Rap Along Song》時，C君仲要求工作人員將全場燈光關閉，隨後同陸永一齊喺漆黑環境中悼念2月21號病逝嘅挈友方大同。

C君表示，佢地同大同係好好嘅朋友，而農夫亦係方大同第一個演唱會嘉賓，認為對方係最識欣賞農夫幽默嘅人，有時仲好笑過佢地：「佢好鍾意我地嘅音樂，甚至去到掟爛電話，佢都話正喎正喎。」陸永就形容，大同應該係佢地認識之中，唯一一個肯定冇仇人嘅人，因為「冇人會唔鍾意方大同」

最令人心酸嘅係，C君指開show前曾問過大同會唔會嚟睇，大同當時話自己仍喺康復階段，但如果今年年底農夫有25周年演出，到時就可以嚟睇。C君更即時邀請大同，叫好友到時上台做嘉賓，佢仲話當時大同表示正籌備下一張專輯，希望其中幾首搵佢創作。

大同驟逝令C君感到唏噓無常，但除咗大同嘅家人，最需要被關心嘅就係大同嘅歌迷：「大同嘅歌係俾咗大家好多嘅陪伴，係一個好緊要嘅精神支柱。如果你身邊有大同嘅樂迷，多啲關心佢地。」而關於大同離世嘅事，農夫喺呢晚騷講完就算，因為二人自認「唔係好擅長講呢啲說話」。

最後兩人喺黑暗中唱出一個特別版本嘅《Rap Along Song》， 除咗原曲，亦加插幾段大同嘅《Sing along song》，C君再講，其實呢首歌係啟發自《Singalongsong》。