慧妍慈善晚宴逾半百港姐出席 會長朱凱婷感謝陳茵媺「出山」相助

慧妍雅集 嘅年度大型慈善晚宴盛大舉行，多位港姐都盛裝支持，包括朱玲玲、曹敏莉、向海嵐、王愛倫、陳法蓉、趙雅芝、劉倩婷、翁嘉穗、陳茵媺、郭柏姸、黃嘉雯、宋宛穎、唐麗球、李潔瑩等，加上應屆嘅得獎港姐倪樂琳、梁嘉莹、楊梓瑤 亦同場現身。

今年晚宴以「愛無限」為主題，主力為精神健康嘅工作籌款，身為今屆會長嘅朱凱婷；非常多謝大家鼎力支持，總共有50多位慧妍嘅會員盛裝赴會之外，亦有唔少善長捐款，晚宴未開始經已有6位數嘅善款，令Heidi信心十足。Heidi同時感謝專注家庭嘅好姊妹陳茵媺出山相助，擔任慧妍嘅秘書。

陳茵媺 嘅囡囡Camilla亦遺傳咗媽咪嘅港姐冠軍級美貌，最近去主題樂園體驗化身白雪公主，毫無違和感﹐Aimee都話囡囡的確大得好快，經已冇晒嬰兒肥變成少女模樣，佢仲大爆囡囡相當聰明有主見，好似Aimee為佢籌備生日會，囡囡都幫忙排流程有紋有路，真係從小就美貌與智慧並重。

趙雅芝亦以優雅打扮現身，唔講唔覺佢經已70歲，芝姐依然保養得宜，佢就話靠小心飲食同勤做運動，平日鍾意喺屋企做瑜伽鍛鍊筋骨。

上屆會長李潔瑩今年就一身輕，同老公黎諾懿可以好好享受晚宴，諾懿大爆最近被太太嚴格管促飲食，就快連米飯都唔可以食，而太太就大爆諾懿喺新節目《養生之旅》度需要裸上身，但係見到老公「肥嘟啫」有啲慘不忍睹。

賈思樂、王灝兒、譚輝智亦受邀擔任表演嘉賓，JW最近拍片大曬晒花過千元買嘅潮牌拖鞋，但係令豪宅意外曝光﹐有指JＷ同太子爺男友分手後，搬離對方豪宅，仲以950萬購入兩房單位，片中見到JＷ嘅新居相當華麗，不過呢日佢就澄清新居非豪宅，仲要努力工作供款，4月佢將會喺珠海開騷，佢仲係場地首個演出嘅歌手添。

譚輝智同中聲唱將去完美加登台返港，正適應時差當中，輝智好開心呢次洛杉磯之行成功去荷李活山上嘅標誌打卡，加上當地歌迷相當之熱情令佢相當感動。
今年晚宴筳開約40席，期間拍賣過程相當熱烈，其中趙增熹捐出自己錄音室親自監製嘅一張唱片做拍賣，最終由翁嘉穗以4萬5千元投得，翁嘉穗原來仲係為熱愛唱歌嘅丈夫鄔友正出手呀。