Startalk一氣呵成版｜宇宙最強大談人生起落 自認從影四十多年有一半時間處於迷惘狀態

連續第13年擔任賽馬盛事打吡賽大使嘅 甄子丹 作客《Startalk》接受 王鎮泉 訪問，從做馬主養馬經歷，講到去電影路上嘅成長。

被封宇宙最強嘅丹爺坦言事業路上好似賽馬一樣，努力之餘運氣都好緊要，佢坦言當年19歲時被八爺袁和平發掘演出首部動作電影《笑太極》，的確係屬於佢人生嘅高光時刻，更大爆當年感到飄飄然，覺得自己好威一出道就做主角，滿滿嘅虛榮感。

到後來發現做演員其實一啲都唔簡單，之後立志要努力鑽研呢門學問。丹爺從影邁向第43個年頭，佢自覺頭廿多年都係浮浮沉沉，對自己嘅路向、定位都唔太清楚，當時感覺相當徬徨，亦無辦法解決，唯有相信明天會更好。

正當喺迷惘期中，丹爺遇上佢而家嘅太太汪詩詩，因為詩詩性格正面又健談﹐改變咗佢待人處事嘅看法，更成為佢嘅人生最大轉捩點。當年丹爺曾更被媒體認為好串、生人勿近，訪問中丹爺坦白話當年其實佢內向同怕醜，缺乏自信，唔敢講嘢，亦唔想同Fans影相同簽名，後來被太太嘅性格感染，逐漸了解點樣打開人與人之間嘅隔膜，先有所改變。

丹爺自認不滿足以前嘅表現，對自己部部戲都會挑骨頭，甚至係得獎作《葉問》都有唔少地方拍得唔好，之前好多作品更係唔知自己演咩！佢希望一直提升演技去到告別世界嘅一刻。

講起一對子女，丹爺大讚子女好有音樂天份，一家人經常睇音樂劇演出，聽咗一次回到家中，囝囝就然就可以彈出劇中歌曲，大女甄濟如又可以唱埋一份。大女去年出道做歌手，佢都明白作為宇宙最強嘅囡囡，女兒加入娛圈會飽受非一般嘅壓力，佢亦深信囡囡心臟夠強大應付一切。