《贖夢》上映連續4日成票房之冠 家輝帶隊謝票走足40場

張家輝 自編自導自演嘅《贖夢》，上映後連續4日成為票房冠軍，截至星期日為止票房已收330萬。家輝喺周末更同拍檔 劉俊謙 朱晨麗 李凱賢 許恩怡 袁富華 同 袁綺雯 等現身超過40場謝票，期間仲有女觀眾公然向有婦之夫家輝表白。 

連日同阿謙仲有朱朱周圍謝票嘅家輝非常感激觀眾支持：「互動感覺真係要入戲院先感受到，其中一位觀眾睇咗兩次《贖夢》，克服睇驚嚇片嘅恐懼。又有一對情侶入場，女嘅睇咗幾分鐘就驚嚇離場，事後被睇完全場嘅男友笑佢細膽。仲有觀眾緊張到連爆谷都倒瀉晒，呢啲都係大家投入嘅反應。其實呢部電影唔係嚇人鬼片，只係題材上有驚嚇元素配合，我都不希望大家因為被嚇怕而抗拒。」 

謝票期間觀眾反應熱烈，阿謙獲Fans特製文醫生證件，佢又同幸運Fans溫馨抱抱。而家輝仲獲Fans親書對偶像嘅愛意，用紙牌公然表白心聲：「鑽石與黃金，不及我對家輝真誠與真心。」令家輝甜到入心，又上前同對方握手。 

而新片於網上互動宣傳效果極佳，戲未上映已成為佳話，大家睇戲之餘亦期待「蔡辛強」同「文醫生」有機會現身，家輝就話：「阿強本身有精神狀況，而文醫生又有難言之隱，未知佢哋可唔可以現身見大家！」 

而家輝所唱嘅片尾曲《永遠的失眠》，令一眾Fans主動為佢check紅館檔期，仲建議家輝6月可以踏上紅館開騷。片中暗戀文醫生嘅朱晨麗就即刻舉手附和，家輝仲認真話：「都可以試下，到時我應該要定期性練歌，但近排我喉嚨唱歌唱得太多有繭，須要休息一下先作打算。」 

戲中一臉鬍鬚光頭出現嘅廿四味成員李凱賢，同一開場就嚇窒觀眾嘅許恩怡都有參與謝票，Brian仲指自己主動提出剃光頭演出，更係由家輝親手操刀。而Natalie話佢演嘅一場係整部電影中最花錢一幕，幸好效果非常震撼，亦有極大迴晌，所以非常開心。