鄭丹瑞為大女婚禮擔任司儀 俞琤開金口以棟篤笑送祝福

鄭丹瑞大女鄭瑤去年同男友Jacob Chan先簽紙註冊成為夫妻，今年2月再完成過大禮儀式，而敬茶儀式、教堂行禮及婚宴亦於27號完成。

婚宴當日，鄭丹瑞嘅身份除咗係外父之餘，仲係愛女嘅婚禮司儀，而林珊珊、小美、樂易玲、張堅庭、陳德森、馬榮成、林超賢、俞琤及陳淑芬等一眾與鄭家相識接近 50 年嘅圈中好友亦應邀出席，俞琤更難得開金口，喺台上幽默地以棟篤笑形式為一對新人送上祝福。

由於藝術係一對新人嘅共同愛好，加上受到藝術週嘅啟發，所以一對新人喺29號舉行咗一場以藝術為主題嘅婚禮酒會，出席嘉賓包括林子祥、葉蒨文、羅啟豪、周秀娜、毛舜筠 、區丁平、蔡一智 、胡琳、林德信、倪晨曦、邱騰華等。場內設有一個藝術展，當中有樂隊、歌劇及小提琴演奏等演出，一對新人藉此嚟同親友分享佢哋嘅嗜好，並於婚禮結束後，為賓客送上以佢哋婚禮Logo訂製嘅小禮物。