譚杏藍變花仙子幸福出嫁 錫爆圈外老公大方放閃

譚杏藍Hana出嫁喇！近年轉型做網紅嘅Hana，兩年前同拍拖十年嘅ToNick主音趙善恆（恆仔）分手後同圈外現任Ronald相戀，並喺上年宣布接受男友求婚。日前Hana就喺社交平台分享多張婚照，並撰文：「2025.03.29 我們結婚了」，正式同Ronald拉埋天窗。

由Hana分享嘅婚照可見，佢所穿嘅一套DeepV婚紗性感亦不失優雅，造型似足花仙子。一對新人喺親友見證下完成儀式，笑得非常幸福，佢地又喺大家面前甜蜜錫錫，大放閃光彈，多位圈中人包括小儀、廖子妤、馮允謙、陳蕾亦紛紛留言為兩位送上祝福。