陳淑芬為張國榮明年冥誕籌備活動 各地哥迷風雨不改赴港懷緬偶像

4月1號係一代巨星哥哥張國榮離世22周年紀念，哥哥生前摯愛唐鶴德凌晨喺社交平台分享一張哥哥從未曝光過嘅舊照，以及哥哥演唱《Monica》嘅片段，配字：「誰能代替你地位」表白自己對哥哥多年未變嘅思念。

世界各地哥迷亦依照每年慣例，帶同各式祭品同鮮花到哥哥嘅長眠地表達心意，而哥哥生前經理人陳淑芬就印制有哥哥簽名嘅紀念品送俾粉絲留念。陳太表示所有哥迷都好有心，所以亦特別準備呢啲小禮物送俾大家，更重要係出年就係哥哥70歲冥壽，所以想聽聽意見，明年用咩新穎方式送一份禮物俾哥哥。

而佢除咗為哥哥出年冥誕策劃大型演出，更積極想為哥哥籌辦紀念展，令大家可以欣賞到哥哥嘅物品。

雖然哥哥離開大家已經一段時間，不過除咗追隨已久嘅哥迷外，每年都會有新嘅「後榮迷」加入，甚至有內地粉絲係為咗哥哥而愛上香港。

好似其中一位23歲內地哥迷喺香港攻讀碩士，更指哥哥係佢嘅精神支柱。亦有粉絲自遼寧遠道而來，足足搭咗三日火車先嚟到香港，只為向哥哥致意。

其實自3月31號開始，喺哥哥離世嘅酒店外已陸續有哥迷致意，而尖沙嘴星光大道，哥哥紀念肖像旁亦布滿鮮花。哥哥雖然已經離開大家22年，但每個人依然未停熄對哥哥嘅愛意，繼續寵愛張國榮。