劉松仁出影集為慈善籌款 婉拒出山尋求平靜隨心

資深藝人 劉松仁 年前被瘋傳曾中風，出入又需以拐杖輔助，不過近年甚少公開露面嘅松哥，去年就再參與製作宗教舞台劇以行動粉碎外間傳聞，近日松哥更推出攝影集《松風捉影》，以個人隨筆記錄生命中唔同階段嘅心路歷程，加上隨心拍下嘅照片同唔少珍貴劇照。

不過攝影集原來係為慈善機構籌款嘅非賣品，松哥希望為河北嘅殘疾兒童同長者慈善機構「黎明之家」籌款。

松哥指多年前已曾實地探訪：「當年有啲腦癱棄嬰，由當地天主教團體拯救後，由義工照顧，我真係被當地服務者感動，即使知道受助者唔會康復，亦負起照顧佢哋一生嘅責任。我親眼目睹殘疾兒童用口摺紙鶴作禮物、真係非常感動。最大嘅啟發係，我哋生活上難免有所得失，不過又算啲咩？佢哋一出世就失去好多，佢哋嘅榜樣，令我學會面對同欣賞生命。」

松哥表示攝影集紀錄咗佢70多年來嘅人生經驗、生活點滴，集合親情，友情嘅感悟，希望透過文字、相片同每位讀者對話：「再出第二本應該冇機會，因為『感言』已經輯錄得七七八八。我冇界定要做咩事，就如大家成日話『出山』，我覺得應該唔可能，因為精力已經有限、時間有限，我知道自己嘅能力。亦很喜歡現階段嘅我，唔強求什麼，一切隨環境隨心而行。」

適逢聖瑪加利大堂100周年，松哥下月將舉行心靈分享會，同其他教友弟兄姊妹近距離接觸。