《蝙蝠俠》韋基馬離世終年65歲 《壯志凌雲：獨行俠》成遺作

曾於《壯志凌雲》（Top Gun）及《新蝙蝠俠 ─ 不敗之謎》（Batman Forever）中演出嘅著名演員韋基馬（Val Kilmer），於美國時間4月1日於洛杉磯因肺炎離世，終年65歲。其女兒Mercedes Kilmer向《紐約時報》證實父親死訊，無數影迷衝到韋基馬嘅社交帳號中留言，表示難以相信。

1986年，韋基馬於《壯志凌雲》中飾演Iceman，佢同湯告魯斯（Tom Cruise）嘅對手戲被影迷封為經典場面，呢齣電影亦令佢於影圈漸露頭角，而電影《新蝙蝠俠 ─ 不敗之謎》中蝙蝠俠一角更成為韋基馬嘅代表作之一。2022年湯告魯斯邀請韋基馬客串續《壯志凌雲：獨行俠》（Top Gun: Maverick），而呢部電影亦成為韋基馬嘅最後作品。

韋基馬於2017年公開自己已罹患喉癌兩年，其後佢透露雖然已康復，但因為氣管嘅手術令佢嘅聲音變得沙啞，以及呼吸變得急促，為咗再次開聲，韋基馬喺氣管中插上電聲箱嚟協助說話。而喺《壯志凌雲：獨行俠》中，更係透過科技將韋基馬嘅聲音重現幕前。