孖譚俊彥飛澳洲任華姐評審 陳曉華以對白回應感情狀況

2024澳洲華裔小姐競選總決賽日前圓滿落幕，TVB Anywhere 安排咗 譚俊彥、陳曉華Hera 親臨悉尼擔任評審及表演嘉賓，由於二人都係第一次到訪悉尼，所以佢哋都好期待同當地觀眾見面。

譚俊彥同陳曉華抵達當地後，隨即出席 2024澳洲華裔小姐競選總決賽嘅發布會，與11位佳麗正式見面，擔任司儀嘅安德尊喺台上除咗問到二人即將開拍嘅新劇《新聞女王2》外，大王仲追問Hera嘅感情狀況，Hera則以劇中對白：「我唔會隨隨便便搵個男人嫁咗佢」嚟回答對方提問。

總決賽當晚Hera獻唱咗兩首歌，又分享佢有份參演嘅《非常檢控觀》、《金式森林》、《死有對證》等劇集，呼籲大家多多支持。至於視帝譚俊彥演唱時，更走向觀眾席與在場嘉賓作近距離互動。當晚由10號 寧紫薇Jessi 奪得冠軍及最上鏡小姐，亞軍 則為12號 謝涵菲Joanna ，而季軍為 7號 徐子玥Zoey。

競選總決賽翌日，譚俊彥及Hera 便舉行見面會，吸引大批粉絲到場支持。大會於見面會前於社交媒體抽出網民嘅提問，並邀請網民到場親自向二人發出提問，及進行近距離互動兼合影。