TVB舉辦全新歌唱節目《聲秀》 新秀班底譚耀文蘇永康任評審

無綫電視喺3號宣布推出全新歌唱選秀節目《聲秀》，比賽結合《新秀歌唱大賽》、《超級巨聲》同《聲夢傳奇》三個具代表性節目元素，並隨即展開首階段本地招募，歡迎16至30歲人士報名參加。而三個賽事嘅代表分別有：譚耀文、蘇永康、劉浩龍、吳業坤、胡鴻鈞Hubert、冼靖峰Archie、張馳豪Aska、何晉樂Rock、黃洛妍Janees等均有現身記招分享參賽體驗。
《聲秀》即刻報名 

總經理曾志偉聽到一眾歌手呼籲十分感動，其中一人分享參加比賽最重要係刹那間嘅動力，呼籲有志者就即刻報名，志偉透露幾位新秀代表不單擔任評審，更想佢哋成為學員嘅導師，陪伴住參賽者成長。

新秀出身嘅蘇永康可以講得經驗豐富，分別擔任過《超級巨聲》同《聲夢傳奇》兩季評審，雖然今次未知喺《聲秀》中會係點，但能夠盡綿力提攜新人都好開心，做咩崗位都唔介意，最重要可以同年青人互相學習。譚耀文覺得應該要有更多同類節目推動參賽者，即使本身自信只有六十分，嚟到經團隊嘅協助必定會提昇。劉浩龍則未必想擔任評審一職，反而想帶領住學員經歷成長期。

Hubert喺台上除咗分享比賽心得，更重着分享心理準備，因為參賽後難免要面對網絡上各方面聲音，提醒參賽者喺呢方面嘅心理要強大，日後佢可以出力協助學員心靈輔導。而坤哥就提醒參賽最重表現自己真實一面，好多時觀眾見你5分鐘就當認識咗你，所以要堅持爭取機會展現自己。

一眾聲夢歌手都期待有更多年輕一輩加入樂壇，先後出戰過《聲夢傳奇》同《亞洲超星團》嘅Archie就提醒要放下自己包袱，先可以好似海綿咁吸收更多。Rock就覺得最緊要係享受舞台。