龔嘉欣獲朋友做媒安排聚會 樂於拓展交友圈認識新對象

龔嘉欣呢日現身一個商場活動，自從成為視后後，嘉欣嘅工作機會大增，簡直忙到冇時停，不過事業得意之餘，大家似乎更關心佢嘅感情生活幾時會有好消息，嘉欣話自己過去確實太專注工作，而家開始都學緊放開自己多啲，身邊朋友都好積極幫佢介紹對象，安排好多聚會等佢識多啲朋友，自己亦都好樂意出席。

嘉欣下個月就要踏上舞台，同陳山聰、馬國明、丁子朗、冼靖峰等為一個拼盤演唱會獻聲，佢而家嘅心情既興奮又緊張，嘉欣話好多謝客戶慧眼識英雄，睇中咗佢都可以表演唱歌，雖然自己歌藝未必最好，但希望開心嘅感覺比大家。自己特別揀咗輕快嘅歌曲希望可以炒熱氣氛，到時亦會盡量滿足大家簽名合照嘅要求。