7歲李元元鋼琴演出揮灑自如 自信Ending pose搏得全場掌聲

李璨琛 嘅大女 李元元 ，啱啱過咗7歲生日，平時喺網上古靈精怪非常可愛嘅佢唔單止係一個開心果，原來仲係一個小小音樂家。自舊年開始學琴嘅Lucy，學咗幾堂已經充份展現咗佢嘅音樂天份，仲被佢嘅Fans封為新一代鋼琴女神。

音樂細胞相當澎湃嘅Lucy，啱啱參加咗一場音樂演出，呢次Lucy負責鋼琴獨奏，而身後仲有一班管弦樂團同佢一齊合奏，難度指數相當高。不過Lucy就自信十足，即使面對台下咁多觀眾，仍然零怯場相當淡定，年紀小小嘅佢，要駕馭呢啲大場面，真係無返啲壓場感都做唔到。

不過Lucy相當叻女，喺成個表演過程中，將佢平日練習嘅琴技，發揮得淋漓盡致，舉手投足都充滿自信，簡直投入到好似進入無人之境，而最後嘅Ending pose仲相當有型，搏得全場掌聲。