李鍾碩訪台被粉絲包圍㷫烚烚 楊謹華為新角色閉關做功課

韓星 李鍾碩 相隔一年多再度訪台出席時尚品牌活動，以型格皮褸Look現身嘅佢雖然行程匆匆，但仍吸引大批粉絲支持。撞啱日前台灣天氣升溫，加上被熱情粉絲重重包圍，令現場氣氛熱上加熱，李鍾碩都要不斷抹汗，貼心嘅佢喺現場仲問傳媒同大家熱唔熱，好想趁住呢個咁好嘅天氣喺台灣觀光。

接住李鍾碩向粉絲分享近況時指，自己對上嘅作品已經三年前，現正用心拍攝，叫粉絲可以期待一吓。

同場現身活動嘅仲有 楊謹華，謹華呢次為全新概念店開幕，講笑話未收到報酬經已大出血，因為行概念店時買咗唔少心頭好。而近日謹華為咗籌備新角色，大多數時間都宅在家中睇劇本做準備。

另外憑住韓劇《現在撥打的電話》而爆紅嘅韓星蔡秀彬，同樣訪台出席一個品牌活動，首度到台灣嘅佢，現身時不斷向觀眾大派心心，相當可愛親民，蔡秀彬雖然擁有一身fit爆身形，但私下嘅佢原來都好為食，喺台北之旅佢已經有目標地去覓食，最想食小籠包，決定會盡情食多啲先返韓國。