葉翠翠老公曾病危細仔患長期病 誤信人損天文積蓄先後兩度抑鬱

2005年港姐冠軍 葉翠翠 ，2015年同建築師男友 周曉東 拉埋天窗，婚後四年抱三。身為三子之母嘅翠翠專心照顧家庭，同時又喺網上分享育兒心得，婚後生活美滿幸福。

不過近年發展KOL事業嘅翠翠，早前接受資深傳媒人汪曼玲專訪，就竟然透露自己近年曾兩度患上抑鬱。翠翠指自己首次發病喺2020年，細仔出世後3個月，當時佢同時間照顧三個小朋友又要搬屋，雖然有家傭幫手，但壓力太大而誘發抑鬱。

佢話「當時突然發現自己無故會坐喺度喊，有時唔諗嘢都會喊，覺得好辛苦，人生冇意義，持續咗半年。每日到小朋友下晝瞓咗覺，就會入廁所鎖埋門坐喺地下大喊。最嚴重時曾試過攞輕生，又試過喺浴缸放水，諗好晒成個畫面。」

但當諗起如有任何不測，三子會失去母親，翠翠就決定鎮作積極運動，最後用半年時間克服情緒問題。

可惜之後再有挑戰出現，翠翠指細仔約一歲三個月大時發現身體出現問題，醫生診斷後指細仔病情再拖延，可能會無法好轉，於是入院接受手術。當時佢眼見細仔全身插滿喉管，自責若非之前有抑鬱問題，應能及早察覺細仔嘅問題及早求醫，不會演變成為長期病患者。

而當細仔病情穩定嘅半年後，翠翠老公Raymond又得大病，醫生仲要求即時留院，當時正值疫情，翠翠曾想送老公到內地醫治，但醫生指Raymond捱不過隔離時程，最後留港診治，幸一度病危嘅老公大步檻過。翻看翠翠社交平台，其實過去三年多，Raymond已絕跡家庭相片中。

不幸故事一不離二、二不離三，翠翠透露兩年前信錯人，令佢損失天文數字積蓄，仲尚有手尾要執，令佢壓力倍增導致情緒再出問題。不過即使面對生活重重難關，翠翠仍堅持每晚直播，縱有時粉絲發現唔開心，亦從中獲大家打氣，而大家嘅鼓勵亦令佢捱過低潮，更覓出人生道理，就係同自己講一定做到，唔放棄就能克服一切。