中年好聲音3｜劉洋沈宗賢兩代重炮奪最高分黃博Ramon《囚鳥》成MVP之選

星期日播出嘅一集《中聲3》播映「中2生助力賽」下半場，14強選手繼續競爭晉身12強席位，最高分由兩代「重炮手」劉洋同沈宗賢合唱《讓我一次愛個夠》獲94分亮麗成績。

沈宗賢直言初時猶豫到底solo部分係咪太長，而音樂總監Donald Pak專業意見指：「Donald 話點會有人鍾意短呀！」肥媽亦隨即附和，並以弓箭形容樂隊與歌手：「長啲好，聽多啲嘛。你哋同Band夾到，尤其最尾好正，直情帶我哋返番去Live House。歌手係射箭支箭，隊 Band係弓，弓嘅力量好緊要，同箭都出好啱嘅力，我好鍾意呢隻歌。」

而周國豐就讚兩人唱出搖滾味，尤其劉洋運用咪高峰支架出神入化：「劉洋控制Mic Stand所有動作、Timing都控制得好好，所以你個分好難好低。」至於關心妍就對重炮手由柔情到漸進式爆發激讚：「去到最尾爆嗰吓，好打入心！個Performance好好睇，Very Good！」

總結上下半場競賽，關心妍選出與羅啟豪合唱《囚鳥》嘅「女大魔王」黃博為MVP，再度奪得「最有價值選手」。而本集3位參賽者曹越、羅逸軒同任永健跌入「中年危機區」，評審再後決定淘汰與陳俞霏合唱《給我感覺》獲81分嘅任永健，以及上半場同李佳獻唱《滾滾紅塵》獲83分嘅阮慧珊，分別成為《中聲3》第14名同第13名。

14強止步嘅「抗癌戰士」任永健，13年前確診鼻咽癌更一度因病失聲，佢曾指參加《中聲3》係為做「勇於挑戰，追尋夢想」好榜樣予孩子；佢話：「爸爸今日終於舞台離開，喺呢個社會、世界裡面叻人有好多，但輸咗唔代表乜咩，係一個經歷，令人生繼續前進嘅一部分。唔好因為對手好叻就怕而唔玩，爸爸想你知，爸爸日日要對住『大魔頭』，其實爸爸每日都好驚，但我都會繼續努力。冇諗過自己喺呢個比賽得到好多好多嘢，周Sir雖然成日畀好低分，但佢係一個無論台前定台下都對我好鼓勵、畀到好多信心，亦都畀到意見我嘅一個評審，我覺得好感動，多謝。」而向來暖心嘅肥媽就送上愛的鼓勵話：「你冇輸，你第14名呀！」

至於排名第13嘅阮慧珊，同樣鼓勵大家勇敢追夢：「原來下定決心，真係有機會做到！大家如果有夢想就去啦，追夢過程一定比你想像中豐富同精彩。」24年前患上第一型糖尿病嘅佢靠唱歌治癒情緒：「病開始時心理唔穩定，唱歌可以分散注意力、令我開心番嘅方法，係一種好享受嘅方法。」

《中年好聲音3》星期日晚 21:00 翡翠台