扮嘢王李思捷月底再開笑唱會 親自度身創作電影劇本角色

向來以幽默搞笑風格深受觀眾喜愛嘅「扮嘢王」 李思捷，早前現身《聲生不息・大灣區季》，同「福祿壽」拍檔阮兆祥發功模仿阿Lam林子祥同Sally葉蒨文，激似搞笑獲觀眾一致好評。隨後思捷又馬不停蹄到澳門舉行「李思捷百變天王笑唱會2.0」大放笑彈，反應熱烈，月底仲會喺佛山加開大型笑唱會。

今次笑唱會思捷獻唱唔少快歌之餘，亦「開箱」多首過往未曾獻唱嘅歌曲，仲有10年前由佢親自創作嘅《後備》。花費大量心力編排笑唱會嘅思捷，希望觀眾享受愉快嘅演出，而笑唱會中當然有佢最擅長嘅模仿環節。

思捷今次模仿劉德華、張學友、呂方、張國榮等歌聲演出，而一直「扮嘢」成性嘅佢亦都指：「每次演出只要有掌聲同笑聲就有成功感，好似扮四大天王、秋官(鄭少秋)、蔡楓華都好有成功感。」雖然思捷堪稱為扮嘢王，不過就對自己模仿女歌星唔算太滿意喇：「模仿外貌唔難，最難係模仿女性聲線，又要唱得好，要額外花時間勤力練習。」

今次笑唱會中思捷單槍匹馬上陣，不過佢笑言已經非常習慣，因為「福祿壽」兩位好兄弟王祖藍目前主力發展內地節目，而祥師兄亦辦個人棟篤笑，三人各自努力。

問到可會挑戰揀篤笑時，思捷就指棟篤笑看似簡單，不過需投放大量時間、心力創作：「以『大師兄』黃子華、許冠文為例，佢哋兩位前輩需要2至3年先創作到一次棟篤笑，要喺台上講足兩個鐘引人笑係好難嘅事。如果笑唔出，就浪費觀眾兩個鐘時間，自己又瘀，所以引人笑，係難過唱一首好歌，因為唱歌可以練，但引人笑要現場先知反應，所以一定要有肯定性先可以去做呢件事。」

思捷對上一次拍劇，已係2019年嘅《她她她的少女時代》，佢透露今年會為自己度身訂造電影劇本，為自己創作角色，雖然巿道不明朗，不過思捷工作已排得密密麻麻，除笑唱會外，將再與「福祿壽」到外地登台，又會同男團「Hey Brother」推出新歌。