邱鋒澤自認油腔滑調冧fans 陳零九獻唱《愛愛愛》致敬

台灣歌手陳零九同邱鋒澤組成嘅「九澤CP」日前嚟到香港舉行巡迴演唱會戶外星空香港限定場，並邀請咗男團U:NUS擔任香港站演唱會嘉賓，而馮素波及杜燕歌亦有到場欣賞，波姐仲話煲咗「嫲嫲靚湯」嚟為二人應援。

九澤CP除咗賣力演唱外，仲為在場數千歌迷上演咗一場時裝騷，換上多套服裝上場，期間兩子又聯同dancer 勁歌熱舞，並與fans近距離接觸，搞到全場熱血沸騰！

演唱會上陳零九獻唱出方大同名曲《愛愛愛》致敬，佢指原本想選唱自己歌，但因為呢首歌對佢嚟講好有意義，同時亦影響咗佢好多，所以決定選唱呢首歌，同時又發起全場大合唱。

當九澤CP於台上合唱《水火相容》時，邱鋒澤邊彈結他邊走近觀眾席，並對台下fans表示：「呢次Party最重要就是close，夠近沒有？在戶外辦騷、看住夜景真的很浪漫，多謝天氣很好，但我心中最美的夜景是你們（fans）！天啊！為什麼我這樣油腔滑調，壞習慣很難改！」

自己好耐冇唱跳嘅邱鋒澤，落力跳唱《Deep》後笑言終於可以鬆一口氣：「其實我真的很害怕唱跳，但是為了大家、為了這次的演唱會，我還是努力的在把我的身體記憶記起來，所以是非常好玩！非常想念大家、非常想念舞台。」

演唱會歌度安歌，期間工作人員更推出生日蛋糕為陳零九慶祝，九澤CP又搞笑地互換巨型鑽戒，台下fans見狀即大叫「親一下」，點知邱鋒澤聞言即拒絕，原因係陳零九感冒。寵粉嘅九澤CP即席選樂迷上台，面對面又唱又跳，之後仲以廣東話向全場fans表愛意：「你哋受唔受溝啊？」冧爆香港fans。