破格犯罪電影入選紐約亞洲電影節 岑珈其與楊偲泳拍咀戲怕醜拒激吻

 談善言 林家熙 岑珈其 楊偲泳 袁富華 楊偉倫 等主演嘅動作犯罪電影《搗破法蘭克》入圍「第22屆西班牙亞洲夏日電影展」競賽部份，日前仲同時入選「第24屆紐約亞洲電影節」。

電影講述一班叛逆青年組成劫富小隊，戴上兔仔面具犯案，仲會自拍械劫過程上載網上，更留下塗鴉標記挑戰道德底線。雖然賭上自身前途同安危，但為求點擊流量，佢哋更公然狙擊奸商，引發社會軒然大波。

呢部新片打破過往傳統犯罪電影風格，顛覆一貫手法，不論導演同演員都以嶄新方向挑戰固有框架。

楊偲泳同岑珈其喺戲中飾演一對曖昧賊拍檔，兩人出生入死之餘仲不乏拖手逃命、感情嘴戲。Renci主動向怕醜仔嘅珈其獻吻，導演仲喺開鏡首日就拍攝咀戲，令珈其表現超級尷尬，Renci仲踢爆珈其原先建議「脷疊脷」但臨陣縮沙，被老友楊偉倫恥笑「得把口」。

珈其就指同Renci 之前兩度合作都扮演情侶，但嘴戲欠奉，反而今次竟然有得錫，搞到佢話要多謝非常專業嘅Renci。而Renci就笑指：「本身圍讀時尺度係大嘅，導演本身諗住激啲，我之前擔心過人身安全，因為珈其太太係跆拳道黑帶。」可惜最後導演為維持緊湊節奏，忍痛剪走呢場戲。

而另一場兩人拖手戲就非常浪漫，珈其話：「我覺得好似動漫嘅浪漫鏡頭，共患難共生死。」而Renci仲講笑話：「我唔敢拖咁耐，驚抽離唔到。」