黃一山集《笑聲救地球》班底重聚 廖偉雄自爆中風後精神現身

由 廖偉雄（阿燦）、黃一飛、黃一山、胡大為等笑星演出嘅經典綜藝節目《笑聲救地球》，90年代初播出時大受觀眾歡迎，當中最令人難忘嘅一定係阿燦嘅「乜太」造型，成為佢從演生涯代表角色之一。

近年積極經營社交平台，不時拍片同粉絲分享生活嘅「細龜」黃一山，最近就約阿燦、節目監製黎文卓、編審陳敏生呢三位節目靈魂人物重聚，令大家非常驚喜。雖然幾位年紀都有返咁上下，不過睇落都精神奕奕。

其中阿燦早前自爆無預警中風，喺2024年11月底發現有中風跡象，雖然食藥後有所緩和，但過幾日喺食飯時又再度不適，感覺非常疲倦：「喺開車返屋企，喺車上瞓，瞓瞓吓突然感覺好急屎，跟住感到頭頂唔舒服。一摸突然發現成粒嘢脹咗出嚟！口唇裡面又脹漲咗！」

到12月時，阿燦突然感到左腳完全冇力，並且失去控制能力，雖然食藥後有所緩和，不過後來佢就發現自己左腳肌肉有所收縮，而佢嘅右腳亦出現連續痛嘅問題，令佢懷疑係之前撞親Pat Pat影響左腳，而右腳就係痛風所致。

雖然面對腳痛問題，但阿燦亦非常積極求醫，無論針灸、拔罐都試過，所以佢都同大家報平安，目前已經好返唔少，亦講：「呢個病情唔係簡單，話中風一定係個心，塞個嘢，有好多原因令你血液流通唔到。」

所以而家喺黃一山嘅片中可以見到阿燦精精神神，都令粉絲們安心不少。