唱片公司齊撐香港唱片店日2025 多位歌手出限量專屬產品列陣

由香港唱片商會舉辦嘅「香港唱片店日2025」即將喺4月12號舉行，今屆繼續推出令人驚喜嘅特別限量實體唱片產品，會喺有份參與活動嘅唱片店，於「唱片店日」當日發售，亦有歌手計劃到唱片店帶驚喜俾樂迷，希望樂迷可以重拾行實體唱片店嘅動力，發掘同體驗喺唱片店購物所帶嚟嘅樂趣。
 
除咗早前已公布TVB Music Group 及 All About Music 嘅十幾款7吋黑膠唱片，以及風行唱片推出歐信希新歌《家傳之寶》嘅7吋薰衣草紫膠外，香港唱片商會透露，因今次活動而生產嘅專屬限量產品有：限量獨立編號1000張謝霆鋒國語專輯《釋放》爆花彩膠唱片；鄭伊健《伊健•十三》金黒條紋彩膠唱片、彭羚《給我唱過的男孩們》 半透明黒加倫子紫彩膠唱片、蔡楓華《白金珍藏版》半透明天藍彩膠唱片，林憶蓮《灰色》粉紅色彩膠唱片，以上四款唱片均以 DMM刻版歐洲壓製，每款限量500張附獨立編號。
 
當中最特別嘅，就係環球唱片會推出張國榮《88演唱會》限量足本3張黑膠套裝，以及《春光乍洩》原聲大碟動態圖像黑膠唱片，音樂播放時膠面會出現好似動畫一樣嘅神奇效果。
 
而香港唱片商會出版嘅獨一無二限量紀念唱片就係為非賣品，樂迷只要喺參與活動嘅唱片店內購買任何產品滿300元即可換領，唱片收錄嘅十一首歌每首都係令人難忘嘅經典，絕對不容錯過。