王祖藍代父牽妹妹出嫁 圈中好友見證溫馨難忘一刻

古語有云「長兄為父」，王祖藍自從爸爸回天家之後，一直都肩負住呢個信念，好好照顧家中長幼。嚟到妹妹出嫁呢個咁重要嘅日子，祖藍當然要代爸爸，牽住妹妹步入禮堂，邁向人生另一重要階段啦。

祖藍妹妹出嫁，圈中好友如蔡少芬夫婦、鄺文珣夫婦等都有親臨道賀，剛好從美國來港出席佈道會嘅黃愷欣亦有現身。文珣仲將祖藍帶住妹妹步入禮堂嘅溫馨感動場面紀錄落嚟，片中所見，李亞男陪伴住奶奶，一齊見證住家中重要時刻。婚宴上，祖藍更為妹妹寫咗首歌，令在場親友賓客無不動容。祖藍亦有分享一家四代人見證妹妹出嫁感動流淚嘅畫面，一切盡在不言中。