94歲谷峰上月家中離世 姜皓文人生低潮時曾獲前輩派錦囊

資深演員谷峰於3月27日下午被家人發現於香港寓所內離世，享年94歲，具體死因未公開。其好友邵音音及契仔衛子雲證實死訊，消息引發影視圈及影迷深切哀悼。

本名陳思文嘅谷峰，1965年加入邵氏電影公司，以獨特氣質成為「反派專業戶」。1982年憑《武松》中武大郎一角首獲金馬獎最佳男配角，隔年再以《待罪的女孩》蟬聯獎項，創下金馬史上罕見冧莊紀錄。谷峰戲路多元，從《新獨臂刀》豪俠、到《九品芝麻官》水師提督常昆、再到電視劇《鹿鼎記》嘅海大富、《倚天屠龍記》嘅白眉鷹王、《十月初五的月光》嘅燉奶鋪老闆汪洋，都令人留下深刻印象，谷峰演出逾300部影視作品，見證香港影視黃金年代。

谷峰以「綠葉角色」塑造無數經典，亦從未忽視傳承責任，其中姜皓文喺綜藝節目《與天地對話》中，透露當年佢陷入自我懷疑，甚至被圈內人斷言「演藝緣盡」，正係谷峰嘅鼓勵令佢重燃鬥志，姜皓文喺節目中引述谷峰話：「捱吓啦，實到你，唔好轉行呀，你身邊啲人走晒咪輪到你囉。」兩人有份深厚情誼，姜皓文對於前輩谷峰離世感難過，「希望谷峰爺爺一路好走。」

邵氏年代同谷峰合作無間嘅姜大衞亦喺社交平台發文悼念「老朋友，老拍檔，老對手，老前輩一路好走RIP」曾經同谷峰曾合作電影嘅李力持亦發微博悼念，讚揚谷峰演技老練、令人懾服，永遠懷念呢位前輩。

谷峰喺2008年拍攝完電視劇《法證先鋒II》後，逐漸淡出影視圈，最後作品為2019年內地動作電影《真假鐵馬騮》。感情生活方面，谷峰曾經結婚，但老伴已喺早年過世，兩人並無子女。淡出娛圈後依然不時出席聚會見老友，最後公開露面係2022年同已故導演楚原等好友聚餐，當時佢面對鏡頭做出招牌V字手勢，笑容燦爛嘅畫面成為觀眾中永遠嘅回憶。