古巨基日本街頭喪玩Cosplay化身動漫角色造型激似Tyson Yoshi

古巨基 最近帶住同門師妹「音樂女神」 海兒 以及YouTuber 程人富 ，去大阪拍攝全新旅遊企劃，更喺日本橋電器街喪玩Cosplay，基仔更自爆係「元祖級Cosplay王」。

海兒同程人富都自認喺動漫範圍非常耍家，呢個時候基仔就自爆係Cosplay元老，三人之後就到一間Cosplay服裝店舖shopping，喺揀衫揀角色時，海兒竟然向基仔爆出一句：「不如你都係做返人啦。」即時激到基仔跳起：「咩叫做返人呀？！咩意思呀你？！嗌我做返個人？！咁即係我而家係唔係人呀？」非常搞笑。

最後基仔Cosplay円城寺仁、程人富扮演高倉健、海兒就化身Seiko Ayase，一齊喺大阪街頭喪玩，又特登走到人多嘅地方遊走，基仔笑言：「今日我地搞到呢個look，要練嘅係乜嘢呀？膽大呀！因為係《膽大黨》吖嘛！無論見到所有人佢地望我地嘅目光係點，我地仍然自信。」更吸引唔少途人圍觀兼拍照。

三人喺餐廳覓食時，亦被店員「認出」，仲讚佢地神還原角色，不過基仔就認為自己係Cosplay Tyson Yoshi：「我覺得好似Tyson Yoshi，你搵返佢紅色頭髮嘅時候對一對。」基仔仲話要將自己呢個造型send俾Tyson睇添！

隨後基仔就向海兒同程人富分享自己過往開騷時嘅Cosplay造型，海兒一睇就認出基仔係Cosplay《Devil May Cry》角色，即時獲得基仔大讚：「真係識喎！識嘢喎！」節目出街後，基仔將自己Cosplay造型同Tyson Yoshi嘅「合照」放上自己社交媒體，即時引嚟Tyson Yoshi留言：「嘩 有feel」基仔就回應：「下次cos埋你個body」十分搞笑。