吳彥祖吳京30年前合照出土 師叔姪因武術結緣期待合作

吳彥祖 日前係社交平台post出一張同 吳京 30年前嘅合照，並分享相識嘅淵源。Daniel出咗名靚仔，但估唔到吳京當年都係貨真價實嘅花美男。而吳京亦隨即轉發Daniel嘅post，仲公開喊話想同對方合作。

Daniel話張相係1995年拍攝，當時吳京隨北京武術隊去美國交流，Daniel寫到：「當時北京武術隊正在美國巡演，我們倆都還沒成為演員。吳京比我大幾個月，所以我一直叫他大吳。是他說我們倆都能成為電影明星的，我當時不相信他。」

吳京六歲就加入北京武術隊，Daniel因為睇咗功夫電影對武術產生興趣，進而拜師學武，Daniel嘅師父係吳京嘅師姐，所以論輩份，吳京係Daniel嘅師叔。1994年Daniel隨師父到北京集訓，當時就係由吳京負責訓練，二人因武術結緣，至今仍維持友好情誼。

雖然二人已經相識超過30年，喺影壇亦各有一片天，不過就從未正式合作過，所以二人嘅粉絲紛紛敲碗，希望佢地可以正式合作，甚至建議佢地可以一齊拍攝《流浪地球4》，希望兩位當事人聽到粉絲許願，可以認真諗諗啦！