刑慧敏積極磨練演技 挑戰將瑜伽墊着出高訂服感

曾任模特兒嘅刑慧敏Sharon，2022年參選香港小姐並奪得友誼小姐，卸任後開始為自己嘅演技進修，去年佢就加入第33期藝員訓練班，跟羅冠蘭、袁富華、錢嘉樂、鄧智堅、賴慰玲、Patrick Sir 林溥來等學演技、武術、主持技巧等，並喺同年年底順利畢業。

除咗進修外，Sharon去年亦為節目《剪裁魔法師》擔任model，同時亦有演出劇集《法證先鋒6 倖存者的救贖》，而今年Sharon則與袁詠儀、江美儀、張曦雯等於新劇《模擬人生》中合作。

而家正放假休息嘅Sharon，日前就應朋友嘅邀請拍咗條挑戰片，事緣係有朋友send咗條片畀佢，問佢夠唔夠膽挑戰下將瑜伽墊着上身，素顏居家look出鏡嘅Sharon就豪言表示：「挑戰咋嘛，又唔使錢，挑戰下囉！」講完就將一張藍綠色嘅瑜伽墊圍上身，睇落相當平平無奇，但點知鏡頭一轉，Sharon就將瑜伽墊着出高級訂製時裝嘅氣勢，佢仲着住呢件瑜伽墊露肩禮服喺海邊行起catwalk，之後又影咗多張時裝照，令人完全忽視佢身上嘅只係一張瑜伽墊。