聲夢歌手齊撐香港唱片店日2025 親赴唱片舖化身一日店長賣碟

第二屆「香港唱片店日2025」喺4月12號舉行，出版同發行商特別喺呢日推出特別版或限定版黑膠同CD唱片，宣傳香港實體唱片嘅價值。聲夢歌手 姚焯菲 詹天文 張馳豪 同埋 林智樂 亦大力響應，更親自去到唱片舖化身一日店長，吸引唔少粉絲同音樂愛好者一早嚟到場買碟，又大聲吶喊應援造勢。

Chantel指自己平時甚少到唱片舖，所以呢日見到好多欣賞嘅歌手都有出黑膠碟，令佢覺得好興奮，雖然甚少踏足，不過Chantel同Windy就話一啲都唔陌生，身旁嘅Aska仲問佢哋其實知唔知咩叫CD，認真搞笑。講起CD，Felix就諗起細個時，經常會攞住Discman出街聽歌喇。

呢次佢哋除咗出黑膠唱片，仲話好期待可以出返一張大碟，又指無論喺設計概念或創作上，都希望可以參與其中，而Aska更話好想出懷舊Cassette帶，覺得特別有意思喎。

為咗享受黑膠唱片嘅音質，Chantel同Windy都想添置黑膠唱盤，由於佢哋呢次推出嘅黑膠碟都係限量出售，所以Felix話想送比家人、監製或幕後人都有困難，而Chantel亦都話好想送比唱片監製陳考威，Felix得悉Gareth就快同Yanny結婚，就提議Chantel可以作為結婚禮物，真係一個幾好嘅idea喎。