袁澧林持續高燒入院缺席開幕禮 寫便條求醫生批准短暫請假出院

曾提名金像獎影后嘅新晉女演員 袁澧林 身為今屆「香港國際電影節」大使，但係日前佢就失場缺席咗開幕典禮，正當大家擔心佢發生咩事時，佢就喺社交平台為此事致歉，原來Angela因病佢持續發高燒入院，更一度燒至41.9度。經理人收到佢高燒嘅消息之後，立即喺Angela未醒之前去到佢樓下帶佢入院。

留院期間，Angela仍然掛住電影節嘅開幕禮，佢話雖然被醫生同經理人強制遏止，不過內心仍然不憤同叛逆，仲喺病床貼咗便條，希望醫生批准佢開幕禮當日下午請假出院，而醫生同經理人當然係唔批准喇。

錯失咗出席機會嘅Angela話自己有一種強烈嘅錯失恐懼症，因為無法出席一個又一個厲害嘅影人映後談，但係事情發展到高燒持續不退，無助開始佔據佢嘅大腦，令佢漸漸再冇諗任何工作、玩樂、休閒嘅餘暇，亦悟出「沒有健康身體呢，就是乜都無」嘅真理 。

睇到Angela嘅帖文都感受到佢有幾咁失落，同高燒幾咁嚴重，不過Angela就向大家報平安透露已經出院，佢仲話「真係小事一椿，多謝大家關心，以後會好好照顧自己。」