網絡翻唱歌手冼婉雯正式追夢 辭退七年正職出道任獨立歌手

學星爺周星馳話齋：「做人如果無夢想，同條鹹魚有咩分別呀！」咁若果真係有夢想，又有幾多人敢犧牲所擁有去追夢呢？十幾年前開始喺網上平台做翻唱歌手嘅 Jess冼婉雯，一直都堅持對音樂嘅熱誠，陸陸續續參加歌唱表演。有一日佢覺得人生要任性一次，就好勇敢辭咗7年嘅正職，正式出道做獨立歌手。

首次擁有自己嘅派台歌，Jess心情特別興奮，仲覺得係自己嘅里程碑，而新歌《眼淚太淺》係描述眼淺嘅女生，當你對一段感情經歷太多次失望，即使喊得再多，都冇法挽回感情而選擇離開，重新出發。

首支派台歌MV，Jess邀請 麥子樂 同 吳祉昊 等演出，Jess喺MV中分別有兩場喊戲，其中一場更係佢嘅親身戀愛經歷「有一場我聲嘶力竭咁喊，而男主角就繼續喺我旁邊瞓覺扮聽唔到。呢個我真實經歷過，其實唔會聽唔到㗎嘛，係咪？所以拍嗰陣，我都有諗過嗰時嘅感覺，相信大家透過鏡頭都會感受到我當時嘅心情。」

麥子樂擔任今次男主角，Jess覺得對方有種若即若離嘅神秘感，而麥子樂就好榮幸參演Jess首個MV，佢又透露自己初出道時曾經諗過做歌手，可惜當時唱片公司倒閉。

Jess用兩個字總結首次拍攝MV的感覺：「好玩！因為我哋成班演員休息嗰陣，會捉住Marco教我哋做手語，係咁問佢啲好刁鑽、好搞笑嘅事，全部人都笑到癲晒，但係一埋位又好集中。我覺得今天全日都處於一個好好笑、好傷心、好好笑、好傷心嘅狀態，好似有啲精神分裂，但係最後大家都好享受成個過程，好多謝大家。」