盧冠廷相隔九年再踏紅館 新歌陪着我走是夫妻寫照

「陪着你走 一生一世也不分」，只要聽到呢句歌詞，大家就會感受到一份愛嘅感覺，而呢種一生所愛嘅故事，正正係主唱嘅 盧冠廷 同太太 唐書琛 嘅寫照。盧冠廷嘅歌曲陪伴唔少人成長，嚟緊大家就有機會聽到佢喺台上演繹作品。盧冠廷相隔9年，決定6月於紅館舉行兩場演唱會，而演唱會主題係「回憶殺」同「匠心精神」。

繼1985年創作《陪着你走》之後，盧冠廷經歷40年嘅時間，創作出演唱會主題曲《陪着我走》，佢聯同歌曲監製葉廣權分享新歌由「你」到「我」嘅歳月哲思。葉廣權指新歌同盧冠廷夫婦係絕配，盧冠廷指夫婦經歷好多，仲自爆二人相處之道係經常拗，因為愈鬧愈精彩。

從事創作逾半世紀，盧冠廷創作路起源於佢患有讀寫障礙，仲曾被李宗盛指佢有社會失調症，唔會有人聘請：「首次創作係喺讀書時期，有次老師要求每一個學生朗誦一首詩，但因為我做不到，而老師准許我改用唱的形式，我就揀咗一首詩，創作咗人生第一首旋律作配合，點知喺同學面前唱歌後，同學都好鍾意，老師仲要求我到每一個班房裏面演唱，因此發現原來音樂可以令到自己生存，自此就創作咗幾十年。」佢又笑言海報上嘅「一生最愛」四個字係出自太太當年填詞嘅真跡，笑言要喺NFT售賣，太太將可以有大把錢。