霆鋒下周展開啟德全爆演出 舞台搭建提早一周已開始

新開幕嘅啟德體育園主場館，下周四就會由相隔25年再於香港開騷嘅 謝霆鋒 登台演出，身為首位香港歌手喺呢個場地演出，唔止先後推出送飛俾Fans嘅網上唱歌活動，又有限量公仔、今日再推出結他擺件，令大家感受到日益濃郁嘅開騷氣氛。

雖然仲有整整一星期先係首場演出，不過據知現場已經開始搭建舞台，由流出照片可見，場中佈滿威吔鋼纜，準備吊起大型燈橋等設備。不過亦有人估計，繼早前Coldplay演出變Closeplay，今次霆鋒嘅演出場地天幕應該亦同樣唔會打開。

據消息指，Coldplay早前完成嘅演出，舞台搭建時間只花費約3日，而今次霆鋒嘅舞台就花足足一星期準備，相信除因製作公司皆為初參與場地製作，需更多時間佈置巨型大場地之外，屆時舞台效果亦應會非常突出。