Bob釋出陳年示愛片 揭大學時曾參演星爺電影

阿Bob林盛斌口才了得就眾所周知，原來佢嘅轉數同幽默感喺大學時候已經被人賞識。阿Bob分享咗一片封塵出土短片，佢話喺大學二年級嘅時候，參加星爺周星馳電影《少林足球》嘅公開招募演員，佢話當時抱住見識吓嘅心態，又順利過五關斬六將被星爺睇中。

當時佢向學校請一個禮拜假去番禺拍戲，客串做流氓隊隊長，即係跌咗士巴拿嗰個角色。不過因為劇組某啲原因要重新拍過，但阿Bob話自己要返學，無奈忍痛離開劇組，佢仲話臨走前同星爺致謝及告別。

阿Bob呢個帖文分享嘅重點，其實係佢返咗學校後，有位佢當時暗戀嘅女同學，用手機影住佢，問佢點解咁快返嚟，點解唔拍埋先走，跟住阿Bob就情深款款借意示愛話唔捨得個女同學。當大家都覺得呢條示愛橋應該萬無一失嘅時候，結果係個女同學有一段好長好長嘅時間避開咗佢。阿Bob重溫那些年回憶嘅同時，就發現原來自己嗰個衰樣同把聲都真係有啲Kam。