狄波拉生完謝婷婷索爆靚樣出土 親解當年兩個夠晒數背後因由

現年73歲狄波拉，早喺1973年出道加入娛樂圈，3年後嫁畀前夫四哥謝賢，之後分別誕下長子 謝霆鋒 同女兒 謝婷婷 ，兩兄妹都遺傳咗父母最強基因，尤其霆鋒更同四哥一樣行Chok爆嘅型格風。雖然拉姑同四哥離婚多年，但依然再是朋友。

拉姑喺顏值最高嘅年華選擇結婚兼生咗兩個小朋友，近日婷婷就上載咗拉姑生完BB後接受TVB 《K -100》節目嘅訪問片，喺相片組成嘅短片中，有一家四口珍貴同框畫面，當中拉姑抱住啱啱出世嘅婷婷，精靈可愛嘅霆鋒就扭計要喺床邊黐實媽咪，四哥就笑得相當開心，喺旁邊照顧老婆，畫面溫情洋溢。值得一提嘅係當年拉姑嘅風采，即使生完婷婷冇耐依然卧於床上，但狀態依然係冠絕群芳。

訪談中拉姑亦解構幫兩兄妹取名嘅因由，佢話：「點解囡囡叫謝婷婷，因為婷婷玉立嘅意思，阿仔叫霆鋒，個霆係雷霆萬鈞個霆，諗住女應該係要斯文啲，希望個女可以婷婷玉立。」拉姑奉行以前嘅年代兩個夠晒數，仲要一仔一女相當圓滿，當時已經講到明暫時唔打算再生，仲笑指：「四哥話放過我暫時休息吓先，之後再算，不過我都認為兩個夠晒數。」

喺婷婷心目中媽咪一直都係最索最靚，所以佢間中都會Post吓媽咪昔日嘅靚相，今次呢條短片更係婷婷從未見過，佢留言大讚媽咪後生時嘅美貎。婷婷現時已經成為母親，體會到媽媽嘅偉大，雖然佢大多數時間喺外地居住，但偶爾都會帶埋囡囡返嚟見屋企人，今年2月一家四口鮮同框，當時霆鋒見到姪女仲父愛泛濫咁樣，好享受家庭樂。