VALC@VIVA獲應援店慶祝生日 化身街頭畫家即席為粉絲獻藝

啱啱過咗嘅4月17號，係女團VIVA成員VALC張鈊貽嘅21歲生日，一班粉絲為佢送上驚喜，早前喺珍珠奶茶店搞咗個應援活動，VALC亦親自到場打卡，佢仲化身街頭畫家幫粉絲畫畫。今次係佢出道後首個同粉絲慶祝嘅生日，佢話：「第一次同fans咁近距離互動咁耐，感覺好親切，真係感受到大家嘅支持！」佢又講到最難忘同搞笑係粉絲突然邀畫，自認畫功一般嘅VALC就盡量滿足大家要求去畫。

至於今年生日願望，VALC話現時要兼顧返學、跳舞表演、工作同私人時間，真係好唔平衡，所以希望大一歲可以搵番自己生活嘅平衡，更有效率分配時間，同埋鞭策自己唔好偷懶。講到正日生日點過，VALC透露行程相當精彩，就係喺屋企做功課，夜晚同屋企人食餐飯，之後排舞排到深夜。