張學友台北補場騷謝歌迷不離不棄 與粉絲約定保重身體唱到70歲

歌神張學友一連四個週末喺台灣嘅高雄同台北舉行「張學友60＋巡迴演唱會」，18號晚喺台北小巨蛋展開最後一週演出，呢三場騷亦係佢上年因病取消演出嘅補場，觀眾等咗10個月終於等到歌神，現場氣氛特別high。

一開場學友就企喺高台演唱《留住這時光》揭開序幕，一連唱完12首歌之後，學友先開口同大家打招呼，佢話多謝大家冇整唔見張飛，冇忘記呢場騷，願意等佢10個月。佢好幽默咁話：「謝謝大家對我那麼…有信心，因為要等漫長的10個月，我想很多人就算了，『我等周董』，劉德華不也來了嗎？謝謝大家沒有放棄我，謝謝大家一直等到現在。今天出來之前，我對著鏡子跟自己講『張學友，你今天要用心唱，讓大家覺得等你10個月是值得的』。大家放心，我今天一定會盡我全力，為大家帶來精彩的晚上。」 

學友承認自己心情緊張，越想做好壓力就越大，佢喺台上邊同大家傾偈，邊做一字馬，「我相信大家已經在網上看過很多次了，我下得去，也可以站起來。」 

呢晚Encore環節長達半個鐘，學友賣大包，金曲大放送，包括《餓狼傳說》、《頭髮亂了》等經典粵語歌，台灣歌迷一樣可以跟住唱，學友話好開心來到台北開騷，除咗全場大合唱指定曲《她來聽我的演唱會》，佢亦想把握機會唱一啲平時少有機會唱嘅歌，好似《月半彎》、《失眠的夜》，以及第一次唱嘅《Linda》。
雖然等咗十個月，但學友誠意十足嘅演出，令大家都覺得意猶未盡，學友同歌迷約定大家都要好好照顧自己，因為要同大家「70+」再見。