薛凱琪疑因方大同離世現抑鬱徵狀 廣州演唱會獲天后鄭秀文任嘉賓送鼓勵

薛凱琪 嘅摯友方大同喺2月時離世，佢近日接受內地傳媒專訪時，終於深入談及方大同離世對佢嘅打擊，Fiona坦言得知方大同死訊一刻，第一時間陷入懵懂之中，雖然喺度喊，但身體冇明顯反應，第二日開始陷入咩都做唔到嘅狀態，食唔落嘢，想嘔、呼吸亦變得異常困難，更形容自己「成個人冇咗一半」。

呢段報道一出大家都擔心Fiona會唔會因為好友離世令抑鬱症復發，而Fiona雖然喺不適嘅狀態，但依然繼續工作同演出。

Fiona嘅巡迴演唱會首站19號於廣州開鑼，為咗以行動鼓勵Fiona，正為澳門演唱會排練嘅鄭秀文亦花近7個鐘來回嘅車程支持Fiona擔任嘉賓，當晚演唱會接近尾聲時，薛凱琪突然向觀眾透露「有一位特別的朋友來到現場」，Sammi隨即由舞台中央驚喜現身。兩人以黑白禮服造型搭配，共同演繹Sammi代表作《終身美麗》。Sammi期間仲為感動落淚嘅Fiona抹眼淚。

Sammi事後亦喺社交平台連發多個Post鼓勵：「今天上廣州的車程來回接近7小時，但為了ah Fi,值得。 Ah Fi數月前找我當嘉賓，這巡迴是她歌唱事業的一個里程碑，也是她巡演首場。 首場對歌來很重要，而身心都會特別緊張，都會很希望自己邀請的嘉賓能夠真的來到。Mi很明這份心情。鐵定身體力行去支持她。 」Sammi表示睇住Fiona出道，見證佢一步步努力走到呢日，見到佢呢晚喺舞台發光，好替對方高興。

演唱會上Fiona亦強忍心痛，唱出方大同嘅《四人遊》、《Love Song》悼念好友，另外同已故方大同隔空合唱《才二十三》嘅環節更令在場觀眾超級感動，中途Fiona忍唔住喊，拎紙巾轉身背向觀眾抹眼淚。Fiona演唱時，螢幕亦展示佢寫予故友嘅信︰「你給了我們和這個地球那麼多的愛，所以我們只會帶着溫暖的微笑，去愛你和想念你。」