釗峰被單方面公開戀情後認愛 化妝師曬海量親密照：4年半快樂

本月初宣布離開效力13年嘅唱片公司，成為獨立歌手嘅梁釗峰， 20號突然被爆出多張與同一女性嘅親密照！當日更有半裸嘅釗峰與對方錫錫嘅相，及女方半裸躺於釗峰身上，二人望鏡影嘅合照。

其實啲相早喺17號就已經被擺上社交平台，而放出照片嘅係一位女化妝師，對方一口氣Po出與釗峰36張合照，以及一條釗峰主動錫佢嘅片。而文中呢位化妝師就寫道：「正正因為我們經歷了太多太多，所以更加珍惜對方🫶🏻感謝你一直的疼錫，4年半快樂，Love u @callstarcf」文尾更@咗釗峰。對於化妝師單方面公開戀情，釗峰回覆傳媒查詢時，就表示知道女友會Po二人嘅合照。

化妝師Po出嘅相，都係正常情侶日常會影嘅合照，好似佢哋日常行街、出席友人婚宴、旅行照等，不過呢個post出街後，網上就再流出多張釗峰同化妝師嘅親密照，好似有半裸嘅釗峰錫女方嘅相，又有一係女方半裸瞓喺釗峰身上，二人望鏡影嘅合照等。疑似係化妝師Po完後又刪除咗呢幾張相。

曾為組合C AllStar主音嘅釗峰，入行以嚟甚少緋聞，2013年曾與張栢芝傳緋聞，但二人均否認此事。2020年6月，釗峰曾於社會平台晒出與一女子背對背嘅合照，並公開指對方係自己相戀四年嘅女友，不過公開戀情一個月後，釗峰就指戀情告終，當時有指係男方出軌導致分手，對此釗峰指自己係個對感情專一嘅人，一定唔會偷食。